शरदचंद्रजी पवार कृषि व संलग्न महाविद्यालय, खरवते-दहिवली मधील माजी विद्यार्थ्यांचा स्नेहमेळावा सांगली येथे उत्साहात संपन्न - आम.शेखर निकम,आम.रोहीत पाटील, प्राचार्य डॉ. सुनितकुमार पाटील यांची प्रमुख उपस्थिती

शरदचंद्र पवार कृषि व संलग्न महाविद्यालय,खरवते-दहिवली, तालुका चिपळूण या महाविद्यालयातील सांगली व कोल्हापूर भागातील माजी विद्यार्थ्यांचा स्नेह मेळावा सांगली येथे मोठ्या उत्साहात संपन्न झाला.या कार्यक्रमास चिपळूण संगमेश्वर विधानसभा मतदार संघाचे आमदार शेखरजी निकम, तासगाव-कवठे महंकाळ मतदार संघाचे आमदार रोहीत पाटील, महाविद्यालयाचे प्राचार्य डॉ.सुनितकुमार पाटील , सांगली,मिरज,कुपवाड महानगरपालीकेचे माजी महापौर दिग्विजय सुर्यवंशी व सह्याद्रि क्रीडा प्रबोधनीचे अध्यक्ष अनिरुद्ध निकम हे प्रमुख अतिथी म्हणून उपस्थित होते.शरदचंद्रजी पवार कृषि व संलग्न महाविद्यालया मार्फत स्थापन करण्यात आलेल्या सह्याद्रि ॲग्री ॲल्युम्नी असोसिएशन च्या माध्यमातून महाराष्ट्रातील सर्व माजी विद्यार्थ्यांना संघटीत करणे, आजी व माजी विद्यार्थ्यांमध्ये मैत्रीचे ऋणानुबंध कायम ठेवणे हा उद्देश ठेवुन हा कार्यक्रम आयोजित करण्यात आला.या कार्यक्रमास सुमारे २०० माजी विद्यार्थी उपस्थित होते.

                  यावेळी विद्यार्थ्यांना आमदार शेखर निकम यांनी संबोधित केले. गेल्या २५ वर्षापासुन अविरतपणे चालु असलेल्या महाविद्यालयाच्या प्रगतीचा आढावा घेत विविध आठवणींना उजाळा दिला.महाविद्यालया मार्फत राबविण्यात येणाऱ्या विविध प्रकल्पांची माहिती त्यांनी विद्यार्थ्यांना दिली व भविष्यात महाविद्यालयामध्ये सुधारित असे कृषि ए-आय सेंटर स्थापन करण्याचे आश्वासन दिले.या कार्यक्रमास आमदार रोहीत पाटील यांनी देखील संबोधित करत स्वर्गीय माजी गृहमंत्री आर. आर.पाटील व आमदार शेखर निकम यांच्या मधील घनिष्ठ मैत्रीपूर्ण संबंध व आठवणीना उजाळा दिला तसेच शरदचंद्रजी पवार कृषि व संलग्न महाविद्यालय हे अद्यावत व सुसज्ज अशा सुविधांनी परिपूर्ण असलेले महाराष्ट्रातील नामांकित महाविद्यालय आहे असे गौरवोद्गार काढले व आपल्या महाविद्यालयीन जीवनातील अनेक आठवणी सांगितल्या. महाविद्यालयाचे प्राचार्य डॉ.सुनितकुमार पाटील यांनी विद्यार्थ्यांसोबत आपुलकीने संवाद साधत मार्गदर्शन केले. महाविद्यालयीन जीवनानंतर विद्यार्थ्यांनी विविध क्षेत्रात यशाची गाठलेली उंची पाहुन ते भावुक झाले व त्यांना पुढील वाटचालीस शुभेच्छा दिल्या.

                      सुमारे पंचवीस वर्षाच्या कार्यकाळात हजारो विद्यार्थ्यांच्या जडणघडणीचे साक्षीदार होता आले,त्यांच्या सुख दुःखात सहभागी होता आले ही माझ्यासाठी भाग्याची गोष्ट आहे असे प्रतिपादन केले.अनिरुद्ध निकम यांनीदेखील विद्यार्थ्यांशी संवाद साधत विविध विषयांवर चर्चा केली.अनेक यशस्वी विद्यार्थ्यांचे सत्कार आमदार शेखर निकम,आमदार रोहीत पाटील,प्राचार्य डॉ.सुनितकुमार पाटील व अनिरुद्ध निकम यांचे हस्ते करण्यात आले.या वेळी सांगली जिल्ह्यातील कृषि क्षेत्रात काम करणारे विविध मान्यवर व पालक उपस्थित होते.हा कार्यक्रम यशस्वी करण्यासाठी प्राचार्य डॉ.सुनितकुमार पाटील यांच्या मार्गदर्शनानुसार डाॅ.हरिश्चंद्र भागडे,श्री.विपुल घाग,प्रा.प्रसाद साळुंके श्री.सुनिल निकम व श्री.गोकुळ पिरधनकर यांनी विशेष परिश्रम घेतले.