माओवाद्यांचा घातपाताचा कट उधळला; गडचिरोलीत स्फोटकांचा साठा जप्त

 

विशेष म्हणजे स्फोटकांनी भरलेले दोन कुकर व दोन क्लेमोर हे बीडीडीएस पथकाच्या मदतीने जागीच नष्ट करण्यात आले आहेत. इतर साहित्य गडचिरोलीला आणण्यात आले आहे. अधिक कारवाई गडचिरोली पोलिसांकडून केली जात आहे.

नागपूर : माओवादविरोधी लढा देणाऱ्या जवानांना लक्ष्य करण्यासाठी दडवून ठेवलेला स्फोटकांचा साठा गडचिरोली पोलिस विभागाच्या जवानांनी जप्त केला. हा साठा वेळीच जप्त करण्यात आल्याने माओवाद्यांचा घातपाताचा कट उधळला गेला आहे. ही कारवाई कुरखेडा उपविभागांतर्गत येणाऱ्या पोमके मालेवाडा हद्दीतील लड्डुडेरा (हेटळकसा) जंगल परिसरात करण्यात आली.

माओवादी सरकारविरोधी घातपाती कारवाया करण्यसाठी शस्त्र आणि स्फोटकांचा वापर कतात. हा साठा जंगलात पुरून ठेवतात. हे साहित्य माओवादी नक्षल सप्तह आणि घातपात घडवून आणण्यासाठी वापरतात. अनेकदा जवानांनाही लक्ष्य केले जाते. अशाच साठा लड्डुडेरा (हेटळकसा) जंगल परिसरात माओवाद्यांनी दडवून ठेवलेला असल्याची गुप्त माहिती मिळाली. या माहितीच्या आधारे विशेष अभियान पथक व बीडीडीएस पथकाच्या जवानांनी माओवादविरोधी अभियान राबविले. यात दडवून ठेवलेली ही स्फोटके सापडली. या साहित्यांमध्ये दोन कुकर, दोन क्लेमोर, एक पिस्तूल, दोन वायर बंडल, पाणी साठवण्याचा एक जर्मन गंज आदींचा समावेश आहे. हे सर्व साहित्य जप्त करून कायदेशीर कारवाई करण्यात आली. विशेष म्हणजे स्फोटकांनी भरलेले दोन कुकर व दोन क्लेमोर हे बीडीडीएस पथकाच्या मदतीने जागीच नष्ट करण्यात आले आहेत. इतर साहित्य गडचिरोलीला आणण्यात आले आहे. अधिक कारवाई गडचिरोली पोलिसांकडून केली जात आहे.

ही कारवाई गडचिरोलीचे जिल्हा पोलिस अधीक्षक अंकित गोयल, अप्पर पोलिस अधीक्षक (अभियान) सोमय मुंडे, अप्पर पोलिस अधीक्षक (प्रशासन) समीर शेख, अप्पर पोलिस अधीक्षक (अहेरी) अनुज तारे यांच्या मार्गदर्शनात पार पडली.

गडचिरोली जिल्ह्यात माओवादविरोधी अभियान अधिक तीव्र करण्यात आली आहे. माओवाद्यांनी हिंसेची वाट सोडून आत्मसमर्पण करीत सन्मानाने जीवन जगावे.