रत्नागिरी कृषि पणन मंडळा मार्फत हापूस आंबा थेट विक्रीसाठी; नोंदणीला ७ मार्च पासून सुरुवात

रत्नागिरी दि.०४:- महाराष्ट्र राज्य कृषि पणन मंडळा मार्फत हापूस आंबा थेट विक्रीसाठी बाजारपेठ उपलब्ध करण्याचे दृष्टीने उत्पादक ते ग्राहक थेट विक्री उपक्रम राबविला जातो. त्याला नेहमीच उत्स्फुर्त प्रतिसाद मिळतो. कोरोनाचे पार्श्वभूमीवर मागील २ वर्षे अनेक अडचणींचा सामना आंबा उत्पादकांना करावा लागला होता. मात्र चालू वर्षाकरीता आंबा उत्पादकांची आंबा विक्री करीता स्टॉल उपलब्ध होण्या करीता नोंदणी दि. ०७ मार्च २०२२ पासुन सुरु करण्यात येणार असल्याची माहिती कृषि पणन मंडळाचे उपसरव्यवस्थापक डॉ. भास्कर  पाटील यांनी दिली.

           स्टॉल नोंदणी करीता आंबा नोंदीसह सातबारा उतारा (मागिल ६ महिने कालावधीतील), आधार कार्ड तसेच स्टॉलवर विक्री करणा-या कुटुंबातील व्यक्तीचे आधार कार्ड प्रत व लसीचे दोन डोस घेतल्याचे प्रमाणपत्र, भौगोलीक मानांकन नोंदणी प्रमाण पत्र प्रत महाराष्ट्र राज्य कृषि पणन मंडळाचे नावे रु.१०,०००/- अनामत रक्कमेचा धनाकर्ष अथवा यापूर्वी अनामत रक्कम भरणा केली असल्यास पावतीची प्रत तसेच विहीत नमुन्यातील अर्ज व हमीपत्र इत्यादी कागदपत्रे नोंदणीसाठी आवश्यक आहेत. इच्छूक आंबा बागायतदारांनी महाराष्ट्र राज्य कृषि पणन मंडळाचे विभागीय कार्यालय, शांतीनगर, नाचणे, रत्नागिरी (०२३५२-२९९३२८) अथवा  कपिल खामकर, कृषि व्यवसाय पणन तज्ञ (८८०५६५२२३३) यांचेशी संपर्क साधून नांव नोंदणी करावी, असे आवाहन सहाय्यक सरव्यवस्थापक, महाराष्ट्र राज्य कृषी पणन मंडळ, विभागीय कार्यालय, रत्नागिरी यांनी केले आहे.