ठळक आजची वैशिष्ट्ये

• मुख्यमंत्र्यांचा पुतळा दहन करण्याचा डाव्या चळवळीतील कार्यकर्त्यांचा प्रयत्न पोलिसांनी हाणून पाडला, पोलीस आणि कार्यकर्ते यांच्यातील धुमश्चक्रीमुळे बिंदू चौकात तणावाचे वातावरण.
• रंकाळ्यातील दूषित पाणी, मासे आणि जलचरांच्या जीवावर, रंकाळा टॉवरच्या बाजूला मेलेल्या माशांचा तरंग.
• जीवनश्यक वस्तूंच्या महागाई विरोधात रेशन बचाव समितीच्यावतीने जिल्हाधिकारी कार्यालयावर धडक मोर्चा, मागण्यांची पूर्तता झाली नाही तर पश्चिम महाराष्ट्रात आंदोलनाची व्याप्ती वाढवण्याचा इशारा.
• करोडो रुपयांची बिलं थकल्याने कोल्हापूर जिल्हा शासकीय ठेकेदार संघाच्यावतीने उग्र आंदोलन, सार्वजनिक बांधकाम विभागाच्या कार्यालयाला ठोकलं टाळं, १ मे नंतर आंदोलन अधिक तीव्र करण्याचा निर्धार.
• विधानपरिषद निवडणुकीचे पडघम वाजले, कोल्हापूर जिल्ह्यातून नेमक्या कुणाला विधान परिषदेवर संधी मिळणार, याबाबत कमालीची उत्सुकता.
• पंचगंगेचे प्रदूषण रोखण्यासाठी वस्त्रोद्योगातील विविध घटक, प्रदूषण नियंत्रण मंडळ आणि महापालिका अधिकाऱ्यांची आंदोलन अंकुश संघटनेबरोबर संयुक्त बैठक, आंदोलकांकडून अधिकारी धारेवर.
• केंद्र आणि राज्य सरकारच्या जाचक अटी आणि नियमांच्या विरोधात राज्यभरातील ८५ हजार कृषी सेवा केंद्र आजपासून बेमुदत संपावर, जिल्ह्यातील सुमारे २ हजार कृषी सेवा केंद्र बंद राहिल्याने शेतकऱ्यांना फटका बसण्याची शक्यता.
• लग्नमंडपात ऐनवेळी नवरीचा लग्नास नकार, एजंटांच्या माध्यमातून ठरलेल्या विवाहावरून कागल तालुक्यातील मुरगुडमध्ये खळबळ.
• केद्रातील आणि राज्यातील सक्षम भाजप सरकारमुळेच कोल्हापूरची सर्वांगीण विकासात घोडदौड, औद्योगिक विस्तारासाठी उद्योजकांनी प्रयत्नशील राहावं, खासदार धनंजय महाडिक यांचं आवाहन.
• तळाशी गावात सरपंचांवर जीवघेणा हल्ला झाल्यानं तणावपूर्ण वातावरण, राधानगरी पोलिसात गुन्हा दाखल होऊन तिघे जण ताब्यात.
• इचलकरंजीतील अतिक्रमणधारकांच्या पुनर्वसनासाठी महापौर उतरले रस्त्यावर, अतिक्रमणधारकांना पर्यायी जागा देण्यासाठी केली पाहणी.
• जिल्हा परिषदेच्या बांधकाम विभागाकडील कंत्राटदारांना बिलं मिळण्याची प्रक्रिया झाली सोपी, अनावश्यक ११ टेबलची संख्या केली कमी.
• स्वच्छतेचं महत्व पटवून देण्यासाठी नगरसेवक उतरले स्वच्छता मोहिमेत, नागरिकांना सोबत घेत फुलेवाडी मुख्य रस्त्याची केली स्वच्छता.
• कर्नाटकातील एकसंबा इथं चेन स्नॅचिंग केल्याच्या आरोपाखाली कोल्हापुरातील शिवाजी पार्कातील तरुणाला संशयावरून घेतलं ताब्यात, स्थानिकांनी पंचनाम्यावेळी केला पोलिसांना विरोध.
• पालकमंत्री प्रकाश आबिटकर यांच्या अध्यक्षतेखाली कोल्हापूर महापालिकेची आढावा बैठक संपन्न, प्रलंबित विषयांवर कालावधी निश्चित करून त्याची निर्गत करावी, पालकमंत्र्यांचे आदेश.
• हातकणंगले तालुक्यातील कुंभोज गावात मिरवणुकीतील वादावादीतून दोन समाजात हाणामारीमुळं तणाव, १० ते १२ जणांविरोधात गुन्हा दाखल.