कुर्ला येथील हॉटेलला भीषण आग; अग्निशमन दलाच्या ५ गाड्या घटनास्थळी; शेजारचे काही गाळे जळून खाक

प्रतिनिधी सिताराम कळंबे- मुंबई- मुंबईतील कुर्ल्यात भीषण आगीची घटना आज शनिवारी रात्री ९.१५ वाजण्याच्या सुमारास घडली आहे. कुर्ल्यातील एलबीएस मार्गावरील एका हॉटेलला भीषण आग लागली आहे. आग लागल्याची माहिती मिळताच अग्निशमन दलाच्या ५ गाड्या घटनास्थळी पोहोचल्या आहेत. या आगीच्या घटनेनंतर परिसरात एकच खळबळ उडाली आहे. या आगीत हॉटेलसह आजूबाजूचे काही गाळेही जळून खाक झाले. यामध्ये काही गाळे एकमजली, दुमजली होते. त्यामुळे आग आणखीन भडकली.

आग लागल्याच्या घटनेनंतर हॉटेल परिसरात एकच धावाधाव झाली. या आगीची माहिती मिळताच अग्निशमन दल घटनास्थळी पोहोचलं. घटनास्थळी पोहोचल्यानंतर अग्निशमन दलाचे जवानांनी आगीवर नियंत्रण मिळवण्यासाठी प्रयत्न सुरु केले. अग्निशमन दलाच्या अधिकाऱ्याने सांगितले की, ही कमी तीव्रतेची आग आहे. अद्याप कोणत्याही जिवीतहानी किंवा जखमी झाल्याचे वृत्त नाही. आगीवर नियंत्रण मिळवण्यासाठी महापालिकेचे अधिकारी, पोलीस आणि वीज मंडळाचे कर्मचारी घटनास्थळावर उपस्थित आहेत.

कुर्ला पश्चिमेकडील लालबहादूर शास्त्री मार्गावर कल्पना टॉकीजच्या समोर असलेल्या एका हॉटेलला शनिवारी सव्वा नऊ वाजण्याच्या सुमारास आग लागली. आग काही वेळातच भडकली. एलबीएस मार्गावर एकमेकांना खेटून दुकाने व हॉटेल्स असल्याने आग वेगाने पसण्याची भीती आहे. घटनास्थळी पालिका विभाग कार्यालयाचे पथक, अग्निशमन दलाचे पथक, चार फायर इंजिन, तीन पाण्याचे ट्रँकर, पोलीस, विद्युत वितरण कंपनीचे पथक दाखल आहे. आग विझवण्याचे काम रात्री उशीरापर्यंत सुरु होते.