मनोमिलनाच्या चर्चा, काकांचा 'दूत' अजित पवारांच्या भेटीला, पत्रकारांनी विचारलं, दादांचा मूड कसा होता? उत्तर आलं...

 

 नागपूर : हिवाळी अधिवेशनाच्या निमित्ताने नागपुरात असलेले राष्ट्रवादी काँग्रेस : शरदचंद्र पवार पक्षाचे आमदार शशिकांत शिंदे यांनी चक्क उपमुख्यमंत्री अजित पवार यांची भेट घेतली. अजितदादांना उपमुख्यमंत्रिपदाबद्दल शुभेच्छा देण्यासाठी सदिच्छा भेट घेतल्याचा दावा शशिकांत शिंदेंनी भेटीनंतर केला. मात्र शरद पवारांचा शिलेदार अजित दादांना भेटल्यामुळे नागपुरातील गुलाबी थंडीत गरम चर्चा सुरु झाल्या आहेत.

अजित पवार यांचे नागपुरातील शासकीय निवासस्थान 'विजयगड' बंगल्यावर अजित पवार आणि शशिकांत शिंदे यांची भेट झाली. अजितदादा दोन दिवसांपासून कुणाच्याही संपर्कात नसल्याने आज सकाळपासूनच नेत्यांच्या रांगा बंगल्यावर लागल्या. शशिकांत शिंदेंमागोमाग सुरेश धस, अदिती तटकरे यांनीही दादांची भेट घेतली.

शशिकांत शिंदे काय म्हणाले?

नवीन सरकार स्थापन झाल्यानंतर राज्याचे मुख्यमंत्री, उपमुख्यमंत्री, मंत्री यांच्या भेटी घेण्यासाठी आम्ही जात आहोत. लोकप्रतिनिधी म्हणून त्यांना शुभेच्छा देणं हे आमचं कर्तव्य आहे. अजित पवारांची भेट झाली नव्हती, दोन दिवस प्रयत्न करत होतो, मी वेळ मागत होतो, पण मिळत नव्हता. परंतु आज सकाळी आठ वाजता भेट झाली. त्यांना पुष्पगुच्छ दिलं, असं शशिकांत शिंदे म्हणाले.

मनोमिलनाच्या चर्चा नाहीत

दोन्ही पवारांमध्ये मनोमिलनाच्या चर्चा झाल्याच्या पार्श्वभूमीवर ही भेट होती का? असा प्रश्न पत्रकारांनी विचारला असता, शिंदे म्हणाले की, अजिबात मनोमिलनाची चर्चा झाली नाही. गर्दी होती, आम्ही एकमेकांची विचारपूस केली, दोन मिनिटात भेट आटोपली. आमचे इतक्या वर्षांचे संबंध आहेत, शुभेच्छा देण्याचा कुठलाही वेगळा अर्थ काढू नये. सरकारचे जे चांगले निर्णय असतील, त्यात सहकार्य करु, जिथे भूमिका चुकेल तिथे विरोध करु, लोकांचे प्रश्न सुटले पाहिजेत, अशी माहिती शशिकांत शिंदेंनी दिली. विरोधीपक्ष नेते आणि सभापतीपदाबद्दल बैठकीत निर्णय घेऊ, असंही शिंदेंनी सांगितलं.