भोस्ते घाटात मासळीचा कंटेनर उलटला

 

खेड : मुंबई-गोवा महामार्गावरील भोस्ते घाटात ब्रेक निकामी झाल्याने ताजी मासळी वाहून नेणाऱ्या कंटेनरला अपघात झाला. अपघातानंतर हा कंटेनर रस्त्याच्या विरुद्ध दिशेला जाऊन शेतात उलटला.

 

या अपघातात कंटेनरच्या केबिनमध्ये पाय अडकलेल्या चालकाला पोलीस आणि नागरिकांनी बाहेर काढले. हा अपघात रविवारी रात्री 8 वाजण्याच्या सुमारास घडला. अपघातानंतर मासळीचे क्रेट शेतात पडल्याने अपघातस्थळी माशांचा खच पडलेला पहावयास मिळत होता.

 

गुजरात राज्यातील वेरावळ ट्रान्सपोर्ट कंपनीचा कंटेनर ताजी मासळी घेऊन गोव्याकडून मुंबईकडे चालला होता. महामार्गावरील भोस्ते घाट उतरत असताना कंटेनरचे ब्रेक अचानक निकामी झाले आणि चालकाचे कंटेनरवरील नियंत्रण सुटले. चालकाने कंटेनर नियंत्रित करण्याच्या प्रयत्न केला मात्र तो कंटेनर भोस्ते घाटातील स्वरूप ढाब्याजवळ रस्त्याच्या विरुद्ध दिशेला जाऊन शेतात पलटी झाला.

अपघात झाला तेव्हा झालेल्या मोठा आवाज झाल्याने आजूबाजूच्या नागरिकांनी अपघातस्थळी धाव घेतली. केबिनमध्ये पाय अडकलेला चालक मदतीसाठी याचना करत होता. मात्र क्रेन शिवाय त्याला बाहेर काढणे शक्य नव्हते. अपघात झाला तेव्हा काळोख असल्याने मदत कार्यात अनेक अडचणी येत होत्या. घटनास्थळी पोहचलेल्या युवकांनी कंटेनरची केविन उचलण्याचा प्रयत्न केला मात्र तो असफल ठरला. अपघातानंतर मासळीचे क्रेट शेतात फेकले गेल्याने शेतात बांगड्यांचा स पडल्याचे चित्र होते.

 

खेड पोलिसांना अपघाताची माहिती मिळताच पोलीस तात्काळ घटनास्थळी दाखल झाले. परिस्थिती गंभीर असल्याने पोलिसांनी तात्काळ क्रेनला पाचारण केले. यावेळी क्रेनच्या मदतीने कंटेनरची केबिन वर उचलून अडकून पडलेल्या चालकाला बाहेर काढले आणि रुग्णालयात दाखल केले. मुंबई गोवा महामार्गावरील भोस्ते घाट हा दिवसेंदिवस धोकादायक होत चालला आहे. दोन दिवसांपूर्वीच एका कंटेनरने महामंडळाची एसटी बस, दुचाकी आणि युटिलिटी जीपला धडक दिली होती. ही घटना ताजी असतानाच रविवारी रात्री पुन्हा कंटेनरचा भीषण अपघात झाला. भोस्ते घाटातून प्रवास करताना चालक आणि प्रवाशांना जीव मुठीत धरून प्रवास करावा लागत आहे.