पतसंस्थेच्या नावे लाटले लाखो रुपये; खाते न उघडताच जमा केले लोकांकडून पैसे

 

 

वहाद याच्या या कारनाम्यामुळे खातेदारांची फसवणूक झाल्याने पतसंस्थेच्या अध्यक्षांनी त्याची साकीनाका पोलिस ठाण्यात तक्रार केली. या तक्रारीवरून त्याच्या विरुद्ध फसवणुकीचा गुन्हा दाखल केला आहे.

मुंबई : मध्यमवर्गीय कुटुंबातील व्यक्तींना पतसंस्थेमध्ये पैसे बचत करण्यास सांगून कर्मचाऱ्यानेच ३३ लाख रुपये लाटल्याचा प्रकार साकीनाका येथे उघड झाला आहे. हा कर्मचारी खातेदारांकडे नियमित जाऊन पैसे जमा करीत होता, मात्र जमवलेली रक्कम त्याने पतसंस्थेमध्ये भरली नाही. ग्राहक पैसे काढण्यासाठी पतसंस्थेच्या मुख्यालयात पोहोचले त्यावेळी त्यांचे खातेच उघडण्यात आले नसल्याचे दिसून आले.

अंधेरी साकीनाका येथील खैरानी रोडवर प्रगती को-ऑपरेटिव्ह क्रेडिट सोसायटी या पतसंस्थेचे मुख्यालय आहे. वेगवेगळ्या योजनांतर्गत खातेदार पतसंस्थेमध्ये पैसे गुंतवितात आणि खात्याचे पासबुक खातेदारांना दिले जाते. खातेदारांकडून नियमितपणे पैसे जमा करण्यासाठी प्रतिनिधी नेमण्यात आले आहेत. वहाद अहमद खान हा कर्मचारीदेखील खातेदारांकडून पैसे जमा करून ते पैसे पतसंस्थेच्या कार्यालयात आणून जमा करतो. एप्रिल महिन्यात एक खातेदार पतसंस्थेच्या कार्यालयात आला आणि वहाद याची तक्रार करू लागला. याबाबत वहाद याला विचारणा केली असता त्याने काहीच उत्तर दिले नाही. खातेदाराने पासबुक दाखवले त्यावर जवळपास ९० हजारपेक्षा अधिक रक्कम जमा केल्याची नोंद होती, मात्र पतसंस्थेमध्ये तपासले असता खातेदार म्हणून त्याचे नावच नसल्याचे दिसून आले. वहाद याचदरम्यान पतसंस्थेच्या कार्यालयातून निघून गेला. नेमकी काय भानगड आहे याची तपासणी करण्यासाठी पतसंस्थेच्या अध्यक्षाने त्याला संपर्क केला, मात्र त्याचा मोबाइल बंद होता.

एका खातेदाराबाबत हा प्रकार घडला असतानाच आणखी एकेक खातेदार पतसंस्थेत येऊ लागला. या सर्व खातेदारांच्या बाबतीत असेच काहीसे घडले होते. कुणी ५०, तर कुणी एक लाखापर्यंतची रक्कम भरली होती. सुमारे ४०पेक्षा अधिक खातेदारांचे वहाद याने ३३ लाख २७ हजार रुपये लाटल्याचे उघडकीस आले. वहाद याच्या या कारनाम्यामुळे खातेदारांची फसवणूक झाल्याने पतसंस्थेच्या अध्यक्षांनी त्याची साकीनाका पोलिस ठाण्यात तक्रार केली. या तक्रारीवरून त्याच्या विरुद्ध फसवणुकीचा गुन्हा दाखल केला आहे.