लोकसभेत कौतुक, पण विधानसभेत तक्रारी; सोलापूर पोलीस अधीक्षक तेजस्वी सातपुतेंची तडकाफडकी बदली

 

Ips Officers Transfer : ऑपरेशन परिवर्तनमुळे सोलापूर पोलीस दलाचा उल्लेख लोकसभेत झाला होता, पण खुलेआम सुरू असलेल्या अवैध धंद्यामुळे राज्याच्या विधानसभेत भाजपा आमदारांनी सोलापूर पोलिसांविरोधात लक्षवेधी सूचना मांडल्या होत्या.

 

सोलापूर : शिंदे फडणवीस सरकारने गुरुवारी 20 ऑक्टोबर रोजी रात्री राज्यातील आयपीएस अधिकाऱ्यांच्या बदल्यांचे परिपत्रक जाहीर केले आहे. सोलापूर ग्रामीण पोलीस दलाच्या पोलिस अधीक्षक तेजस्वी सातपुते (Tejaswi Satpute) यांची अचानकपणे झालेली बदली सोलापूर पोलीस दलाला धक्कादायक ठरली. तीन वर्षे पूर्ण होण्याअगोदरच तेजस्वी सातपुते यांच्या जागी नाशिक पोलीस अकॅडमी मधील शिरीष सरदेशपांडे यांची नियुक्ती झाली आहे. ऑपरेशन परिवर्तनमुळे सोलापूर पोलीस दलाचा उल्लेख लोकसभेत झाला होता, पण खुलेआम सुरू असलेल्या अवैध धंद्यामुळे राज्याच्या विधानसभेत भाजपा आमदारांनी सोलापूर पोलिसांविरोधात लक्षवेधी सूचना मांडल्या होत्या.

ऑक्टोबर 2020 मध्ये सातपुते रुजू

सातारा येथे दीड वर्षे ड्युटी करून करोना महामारीत पोलिसांसाठी अतिशय कमी वेळेत म्हणजेच 5 दिवसांत जंबो ऑक्सिजन कोविड सेंटर उभा केलेल्या तेजस्वी सातपुते या ऑक्टोबर 2020 मध्ये सोलापूर पोलीस दलाच्या पोलीस अधीक्षक म्हणून रुजू झाल्या होत्या. सोलापूरला रुजू झाल्यानंतर महिलांसाठी विशेष उपक्रम राबविण्यात येतील, अशी चर्चा सोलापूर पोलीस दलात झाली होती. आता ऐन दिवाळीच्या तोंडावर तेजस्वी सातपुते यांची तडकाफडकी बदली झाली आहे.

 

ऑपरेशन परिवर्तनची लोकसभेत चर्चा

सोलापूर पोलीस अधीक्षक पदी असताना तेजस्वी सातपुते यांनी दारूभट्ट्यांवर काम करणाऱ्या परिवारासाठी ऑपरेशन परिवर्तन उपक्रम राबविले. बेकायदेशीर रित्या सुरू असलेल्या दारू भट्ट्यांवरील महिलांसाठी रोजगार उपलब्ध करून देण्याचा प्रयत्न केला. शिलाई मशीन, किराणा दुकान आदीमधून या दारूभट्ट्यावर काम करणाऱ्या पुरुष व महिलांना ऑपरेशन परिवर्तनला जोडण्यात आले होते .खासदार सुप्रिया सुळेंनी याबाबत लोकसभेत विषय मांडत तेजस्वी सातपुतेचे कौतुक केले होते.

 

 

भाजप पुरस्कृत आमदाराचे लक्षवेधी मांडून गंभीर आरोप

दरम्यान, बार्शीचे अपक्ष व भाजप पुरस्कृत आमदार राजेंद्र राऊत यांनी मार्च 2022 मध्ये सोलापूर पोलिसांबाबत गंभीर आरोप करत राज्याच्या विधानसभेत लक्षवेधी सूचना मांडल्या होत्या. सोलापूर जिल्ह्यात खुलेआम पणे अवैध धंदे सुरू आहेत, असा आरोप करत जिल्ह्यातुन एक ते दीड कोटींचा हफ्ता जातोय असा आरोप केला होता. गुटखा, वाळू तस्करी, मटका आदी खुलेआम सुरू आहे, याबाबत विधानसभा सदस्यांनी तक्रारी केल्यातर त्यांना व त्यांच्या कुटुंबांना खोट्या गुन्ह्यात अडकवण्याची धमकी दिली जात आहे, अशी लक्षवेधी सूचना विधानसभेत मांडली होती. पंढरपूर, मंगळवेढा येथे अवैध व्यवसाय, वाळू तस्करी पोलिस बंदोबस्तामध्ये कशी चालते त्याविषयी आमदार समाधान आवताडे यांनी मांडले होते.