मनसे राज्य सरचिटणीस वैभव खेडेकर यांच्यापाठोपाठ पदाधिकारी, कार्यकर्ते अडचणीत; तिघांना पोलीस कोठडी

 

 

रत्नागिरी : महाराष्ट्र नवनिर्माण सेनेचे राज्य सरचिटणीस वैभव खेडेकर यांच्या पाठोपाठ आता मनसेच्या कार्यकत्यांच्या अडचणीत देखील वाढ झाली आहे.

गणेशोत्सवातील लॉटरी घोटाळा प्रकरणात मनसेच्या तीन पदाधिकारी आणि कार्यकर्त्यांना खेड पोलिसांनी काल (20 ऑक्टोबर) अटक केली आहे. रस्ते आस्थापना जिल्हा संघटक मिलिंद उर्फ दादू नांदगावकर, विद्यार्थी सेनेचे तालुकाप्रमुख प्रसाद शेट्ये आणि केदार वणंजू या तिघांना पोलिसांनी अटक करुन न्यायालयासमोर हजर केले असता या तिघांनाही तीन दिवसांची पोलीस कोठडी सुनावण्यात आली आहे.

तर दुसरीकडे मुंबई उच्च न्यायालयात आज (21 ऑक्टोबर) वैभव खेडेकर यांच्या अटकपूर्व जामीन अर्जावर सुनावणी होणार असल्याची माहिती प्राप्त होत आहे. दरम्यान गेल्या दोन दिवसांपासून वैभव खेडेकर हे नॉट रिचेबल आहेत. गणेशोत्सवातील लॉटरी घोटाळा प्रकरणात वैभव खेडेकर यांच्यावर अटकेची टांगती तलवार असून रत्नागिरीचे लाचलुचपत प्रतिबंधक विभागाचे पथक त्यांचा कसून शोध घेत आहेत. अटकपूर्व जामीन मंजूर न झाल्यास वैभव खेडेकर यांच्या अडचणीत वाढ होण्याची शक्यता आहे.