Andheri Bypolls: राजकीय हालचालींना वेग, भाजपच्या मुरजी पटेलांचा निवडणूक अर्ज भरण्याचा कार्यक्रम अचानक रद्द

 

Maharashtra Politics: आज मुरजी पटेल यांचा उमेदवारी अर्ज भरला जाणार होता. मात्र, हा कार्यक्रम काही अपरिहार्य कारणास्तव पुढे ढकलण्यात आला आहे. आशिष शेलार आणि अन्य वरिष्ठ भाजपा नेत्यांच्या उपस्थितीत शुक्रवारी सकाळी १० वाजता मुरजी पटेल अर्ज भरण्यासाठी जातील, असे भाजपच्या नेत्यांकडून सांगण्यात आले. ऐनवेळी मुरजी पटेल यांचा उमेदवारी अर्ज भरण्याचा कार्यक्रम पुढे ढकलल्याने राजकीय वर्तुळात तर्कवितर्कांना उधाण आले आहे.

मुंबई: अंधेरी पूर्व विधानसभा मतदारसंघाची पोटनिवडणूक दिवसेंदिवस रंगतदार होताना दिसत आहे. या निवडणुकीसाठी सुरुवातीला भाजपच्या मुरजी पटेल यांचे नाव आघाडीवर होते. मुरजी पटेल यांनी मतदारसंघात जोरदार प्रचारही सुरु केला होता. परंतु, गेल्या दोन दिवसांपासून शिंदे गटाकडून (Eknath Shinde Camp) अंधेरी पोटनिवडणुकीत उमेदवार उतरवण्याचे संकेत दिले जात आहेत. त्यामुळे आतापर्यंत निश्चित मानल्या जाणाऱ्या मुरजी पटेल (Murji Patel) यांच्या उमेदवारीबाबत भाजपच्या कार्यकर्त्यांमध्ये संभ्रमाचे वातावरण निर्माण झाले आहे. मुरजी पटेल हे अंधेरी पोटनिवडणूक लढवण्यावर ठाम होते. त्यासाठी मुरजी पटेल गुरुवारी उमेदवारी अर्ज भरायला जाणार होते.

मात्र, आता अखेरच्या क्षणी मुरजी पटेल यांना उमेदवारी अर्ज भरण्याचा कार्यक्रम पुढे ढकलण्यात आल्याची माहिती समोर आली आहे. भाजपच्या स्थानिक नेत्यांकडून यासंदर्भात माहिती देण्यात आली आहे. आज मुरजी पटेल यांचा उमेदवारी अर्ज भरला जाणार होता. मात्र, हा कार्यक्रम काही अपरिहार्य कारणास्तव पुढे ढकलण्यात आला आहे. आशिष शेलार आणि अन्य वरिष्ठ भाजपा नेत्यांच्या उपस्थितीत शुक्रवारी सकाळी १० वाजता मुरजी पटेल अर्ज भरण्यासाठी जातील, असे भाजपच्या नेत्यांकडून सांगण्यात आले. ऐनवेळी मुरजी पटेल यांचा उमेदवारी अर्ज भरण्याचा कार्यक्रम पुढे ढकलल्याने राजकीय वर्तुळात तर्कवितर्कांना उधाण आले आहे. त्यामुळे अंधेरी पोटनिवडणुकीत भाजपऐवजी शिंदे गटाचा उमेदवार उतरवला जाईल, या शक्यतेला आणखी बळकटी मिळाली आहे. आता उद्या तरी मुरजी पटेल उमेदवारी अर्ज भरणार का पक्षश्रेष्ठींच्या आदेशानुसार माघार घेणार, हे पाहणे औत्स्युकाचे ठरेल.

 

मुरजी पटेलांची भूमिका काय?

मुरजी पटेल यांनी बुधवारी अंधेरी पोटनिवडणुकीसाठी मी उद्या उमेदवारी अर्ज भरण्यासाठी जाईन, असे सांगितले होते. काल मुंबई भाजपची एक महत्त्वाची बैठकही संपन्न झाली. या बैठकीला मुरजी पटेलही हजर होते. या बैठकीनंतरच मुरजी पटेलांनी उमेदवारी अर्ज दाखल करण्याचा निर्णय घेतला आहे. पण पक्षाचा आदेश आला तर निवडणुकीतून माघार घेण्याची तयारीही त्यांनी दर्शवली आहे.निवडणूक लढवण्याची सूचना आली तर लढणार, नाहीतर पक्षादेश असेल माघार घेणार. शेवटी मी पक्षादेश पाळणारा कार्यकर्ता आहे. देवेंद्र फडणवीस आणि आशिष शेलार यावर पक्षाची अधिकृत भूमिका मांडतील, असेही मुरजी पटेल यांनी म्हटले होते.