4 महिने गर्भवती असलेल्या महिला वनरक्षकाच्या पोटात लाथा बुक्क्यांनी केली मारहाण

    

      सातारा 21 जानेवारी:* प्राणी गणणेसाठी अधिकाऱ्याला न विचारता वनमजुर महिलांना घेऊन गेल्याच्या रागातून तीन महिन्यांच्या गरोदर वनरक्षक महिलेच्या पोटात लाथाबुक्क्यांनी मारहाण करण्याचा धक्कादायक प्रकार सातारा पळसावडे येथे घडला. यावेळी वनरक्षक पतीसही मारहाण झाली आहे. 

याप्रकरणी पळसावडे येथील संयुक्त वनव्यवस्थापन समितीचा अध्यक्ष रामचंद्र गंगाराम जानकर व त्याच्या पत्नीवर पोलिस ठाण्यात गुन्हा दाखल झाला आहे.  

सिंधू सानप या पळसावडे बिट तर त्यांचे पती सुर्याजी ठोंबरे हे खडगाव बीटमध्ये वनरक्षक म्हणून सेवेत आहेत. काल सकाळी 8 वाजण्याच्या सुमारास वनरक्षक दाम्पत्य वनमजुराला घेऊन पळसावडे वनक्षेत्रात प्राणी गणणेसाठी गेले होते. त्यावेळी प्रतिभा व रामचंद्र जानकर तेथे आले. प्रतिभा जानकर हिने सुर्याजी ठोंबरे यांना चप्पलेने मारहाण सुरु केली. रामचंद्र जानकर यांनीही शिवीगाळ करत मारहाण केली. त्यानंतर गर्भवती सिंधू सानप यांना खाली पाडून हाताने, लाथाबुक्यांनी, दांडक्याने मारहाण केली. त्यानंतर महिलेच्या केसांना धरुन 'तुला जीवंत सोडणार नाही' असे म्हणुन त्यांचे दगडावर डोके आपटले.

वनरक्षक दाम्पत्याने सातारा तालुका पोलीस ठाण्यात धाव घेतली. पोलिसांनी जानकर दाम्पत्यावर गुन्हा दाखल केला आहे. पोलिसांनी दोन्हीही संशयित आरोपींना काल रात्री अटक करण्यात आली आहे असे पोलिस निरिक्षक विश्वजीत घोडके यांनी सांगितले.