बेकायदेशीर मासेमारी करणाऱ्या 36 पर्ससीन नौका पकडल्या

रत्नागिरी : 

पर्ससीन नेट नौकांद्वारे मासेमारी कायद्याचे उल्लंघन करून राजरोस बेकायदेशीर मासेमारी सुरू आहे. गेल्या 15 दिवसात जिल्ह्यातील 36 पर्ससीन नेट मच्छिमार नौका मत्स्यव्यवसाय सहाय्यक आयुक्त कार्यालयाने पकडल्या आहेत. अजूनही मोठ्या प्रमाणात कायद्याचे उल्लंघन करून मासेमारी सुरू आहे.

महाराष्ट्र सागरी मासेमारी कायदा मंजूर झालेला आहे. हा कायदा पर्ससीन नेट मच्छिमारांच्या विरोधात नाही तरी या कायद्याविरोधात पर्ससीन नेट मच्छिमारांकडून आंदोलन सुरू आहे. एकीकडे कायद्याविरोधात उपोषण तर दुसरीकडे बेकायदेशीर मासेमारी सुरू आहे. 1 जानेवारीपासून पर्ससीन नेट मासेमारी बंद झाली. महाराष्ट्र राज्याच्या जलधीक्षेत्रात पर्ससीन नौकाना मासेमारी करण्यास परवानगी नाही तरीही नियम धाब्यावर बसवून जोरदार बेकायदेशीर मासेमारी सरू आहे. गेल्या 15 दिवसात बेकायदेशीर मासेमारी करणाऱ्या 36 नौकांवर मत्स्यव्यवसाय आयुक्त कार्यालयाने कारवाई केल्यानंतर कायद्याचे उल्लंघन करणाऱ्या पर्ससीन नेट मच्छिमारांचा खरा चेहरा समोर आला आहे.

रत्नागिरी जिल्ह्यात मिरकरकवाडा आणि नाटे बंदरात बेकायदेशीर पर्ससीननेट मासेमारीचे प्रमाण सर्वाधिक आहे. बेकायदेशीर मासेमारी विरोधात पारंपारिक मच्छिमार सातत्याने आवाज उठवत आहेत. महाराष्ट्र सागरी मासेमारी कायद्याची काटेकोर अंमलबजावणी करा अशी मागणी पारंपारिक मच्छिमारांकडून केली जात आहे.

'पर्ससीन नौका राज्याच्या जलधीक्षेत्रात दिसल्यास कारवाई केली जाणार आहे. आमचे 9 परवाना अधिकारीसह सागर मित्र या बेकायदेशीर मासेमारीवर लक्ष ठेऊन आहेत. आता पर्यंत बेकायदेशीर मासेमारी करणाऱ्या 36 नौका पकडल्या आहेत.'

– एन.व्ही.भादुले, सहाय्यक आयुक्त, मत्स्य व्यवसाय