काश्मीर हादरलं; सशस्त्र दलाच्या बसवर अतिरेकी हल्ला; २ पोलीस शहीद, १२ जखमी

श्रीनगर: 

जम्मू काश्मीरमधून धक्कादायक बातमी हाती आली आहे. श्रीनगर येथे दहशतवाद्यांनी सशस्त्र पोलीस दलाच्या बसवर हल्ला केला असून या हल्ल्यात २ पोलीस शहीद झाले आहेत तर १२ पोलीस जखमी आहेत. त्यांना गभीर इजा झाल्या असल्याचे सांगण्यात आले आहे.

श्रीनगरमध्ये सशस्त्र दलाच्या नवव्या बटालियनच्या बसवर दहशतवाद्यांनी अचानक हल्ला केला. श्रीनगरमधील झेवन भागातील पंथा चौक भागात हा हल्ला करण्यात आला आहे. सशस्त्र पोलीस दलाच्या बसवर दहशतवाद्यांनी बेछूट गोळीबार केला. त्यात १४ पोलीस जखमी झाले. या सर्वांना तातडीने स्थानिक रुग्णालयात दाखल करण्यात आले मात्र जखमींपैकी एक सहायक पोलीस निरीक्षक आणि एका कॉन्स्टेबलचा उपचारादरम्यान मृत्यू झाल्याचे काश्मीर झोन पोलिसांकडून सांगण्यात आले. दहशतवादी बाइकवरून आले होते, अशीही माहिती मिळत आहे. या घटनेनंतर संपूर्ण परिसरात शोधमोहीम हाती घेण्यात आली असून श्रीनगरला जोडणाऱ्या सर्व रस्त्यांवर कसून तपासणी करण्यात येत आहे.

दरम्यान, दोनच दिवसांपूर्वी बांदीपोरा येथे पोलिसांच्या पथकावर दहशतवाद्यांनी हल्ला केला होता. त्या हल्ल्यात दोन पोलीस शहीद झाले होते. त्यानंतर आज पुन्हा एकदा सुरक्षा दलाला लक्ष्य करण्यात आलं असून या घटनेनंतर संपूर्ण काश्मीरमध्ये बंदोबस्त वाढवण्यात आला आहे.

जखमी पोलिसांची नावे:

गुलाम हसन, सज्जाद अहमद, रमीझ अहमद, विश्वंभर दास, संजयकुमार, विकास शर्मा, अब्दुल मजीद, मुदस्सीर नजर, रविकांत, शौकत अली, अर्शिद मोहम्मद, शफीक अली, सतवीर शर्मा आणि आदिल अली हे बसमध्ये होते. यातील दोन पोलीस शहीद झाले तर बाकी १२ जण जखमी आहेत.

दोन दहशतवाद्यांना कंठस्नान

श्रीनगरमधील रंगरेथ भागात सुरक्षा दलाच्या जवानांनी राबवलेल्या दहशतवाद विरोधी मोहिमेत आज दोन दहशतवाद्यांना कंठस्नान घालण्यात आले. या दोन्ही दहशतवाद्यांकडून मोठ्या प्रमाणात शस्त्रसाठा जप्त करण्यात आला आहे. श्रीनगरमधील एअरफोर्स स्टेशनजवळच ही चकमक झाली. या कारवाईनंतर काही तासांच्या आतच दहशतवाद्यांनी पोलिसांच्या बसवर हल्ला केला. त्यामुळे श्रीनगरमध्ये भीतीचे वातावरण पसरले आहे.