आजची भावलेली कविता

आमचा शिवबा...

सह्याद्रीच्या कडे कपारी स्वराज्याचा नाद गुंजला

मायभूमीच्‍या सेवेसाठी शिवबा आमचा झुंजला || धृ. ||

शिवनेरीवर सिंह जन्मला, आम्हा रयतेचा वाली

जिजाऊचा छावा लढला, करूनी हाताच्या ढाली

या मातीचे पांग फेडण्याचा 'जाणता राजा' अवतरला.

सह्याद्रीच्या कडे कपारी स्वराज्याचा नाद गुंजला || १. ||

तलवारीच्या टोकावरती महाराष्ट्राची शान राखली

शक्ती आणिक युक्तीने शत्रूंनाही धुळ चाखली

दरीदरीतून बोल उमटले मुलुख अवघा दुमदुमला

सह्याद्रीच्या कडे कपारी स्वराज्याचा नाद गुंजला || २. ||

मर्दुमकीची शर्थ इथे ही मर्द मावळा भिडला

गनिमी कावा करून जिंकला गड कोटी वसला

थरथरली ती मोगलशाही ध्वज हिंदवी फडफडला

सह्याद्रीच्या कडे कपारी स्वराज्याचा नाद गुंजला || ३. ||

सह्याद्रीच्या कडे कपारी स्वराज्याचा नाद गुंजला

मायभूमीच्‍या सेवेसाठी शिवबा आमचा झुंजला.

■■ सतिश कोंडू खरात

वाशिम

९४०४३७५८६९

---------------------------------------------