देवीच्या ओट्या भरण्या वरून वाद शिगेला पोहचला, जातिवाचक शिवीगाळ करीत दिली ठार मारण्याची धमकी

तालुक्यातील तुरंबव येथील शारदादेवी देवी मंदिरातील सभा मंडपात नवरात्र उत्सवाच्या अनुषंगाने गाव कमिटी व ट्रस्ट कमिटी यांच्यात बोलावण्यात आलेल्या सभेत देवीच्या ओट्या भरण्यावरून मोठा वाद झाला. उत्सवाच्या काळात देवीची रूपे लावायची मात्र ओट्या फक्त पंडित लोकच भरतील असे संशयित आरोपीने सांगितले. गाव कमिटीचे सदस्य श्रीधर काशीराम पालशेतकर वय ५६ यांनी ओट्या भरायच्या असतील तर सर्व ग्रामस्थांना भरायला द्या असे सांगताच आरोपींनी जातीवाचक शिवीगाळ करीत फिर्यादी यांना ठार मारण्याची धमकी दिली. 

श्रीधर काशीराम पालशेतकर यांनी सावर्डे पोलीस स्थानकात दिलेल्या तक्रारीवरून संशयित आरोपी दिगंबर श्रीराम पंडित, नारायण संभाजी पंडित, सुभाष श्रीराम पंडित, दत्ताराम श्रीराम पंडित, कृष्णा भिकाजी पंडित यांच्यावर गुन्हा दाखल करण्यात आला आहे. या प्रकरणी सदाशिव वाघमारे उपविभागीय पोलीस अधिकारी रत्नागिरी अधिक तपास करीत आहेत.