कोकण रेल्वे मार्गावर धावणाऱ्या दोन पॅसेंजर गाड्या एक्सप्रेस बनून धावणार

 

कोकणवासीयांना दिलासादायक ठरणारी  बातमी म्हणजे कोकण रेल्वे मार्गावर पॅसेंजर म्हणून  धावणार्‍या दोन गाड्या  एक्स्प्रेस गाड्या म्हणून धावणार आहेत.त्यात कोकण रेल्वे मार्गावर धावणार्‍या रत्नागिरी - मडगाव (50101), मडगाव - रत्नागिरी (50102), दिवा - सावंतवाडी (50105) सावंतवाडी - दिवा (50106) या गाड्यांचा समावेश आहे. रेल्वेचे नवीन वेळापत्रक लागू होताच या गाड्यांचा दर्जा बदलला जाणार असून त्यामुळे या दोन गाड्या अधिक वेगवान होणार आहेत.

कोरोना महाभयंकर  काळात लागू करण्यात आलेली बंधने हळूहळू शिथिल केली जात असताना कमी भारमान तसेच तोट्यात असलेल्या पॅसेंजर गाड्यांना मेल/ एक्स्प्रेस गाड्यांचा दर्जा देण्याचा प्रस्ताव देशभरातील 18 रेल्वे झोनकडून रेल्वे बोर्डाकडे पाठवण्यात आला होता. त्यानुसार ज्या पॅसेंजर गाड्यांना मेल/एक्स्प्रेस गाड्यांचा दर्जा देण्यात आला आहे, त्यात कोकण रेल्वे मार्गावरील दोन पॅसेंजर गाड्या मेल एक्स्प्रेस म्हणून धावणार आहेत.

ह्या गाड्यांच्या पूर्वीच्या थांब्यांमधील संख्येत घट होणार असून अधिक वेगवान धावू शकणार आहेत. हा बदल रेल्वेचे नवे वेळापत्रक लागू होईल, तेव्हापासून केला जाणार आहे. रेल्वे बोर्डाने दि. 20 ऑक्टोबर रोजी देशातील 18 रेल्वे झोन्सना पाठवलेल्या पत्रात म्हटले आहे. दरम्यान, या संदर्भात त्या-त्या झोनकडून अधिकृत घोषणा अजून व्हायची आहे.